
حباية واحدة كشفت كل حاجة ج1 الكاتبة نرمين عادل همام
حماتي كانت بتديني حباية واحدة كل يوم الصبح، وتقسم إنها عشان تقوي جسمي وتثبت الحمل…
لحد ما وقعت واكتشفت سر مكنش يخطر على بال بشر.
اسمي هدى، عندي سبعة وعشرين سنة، ومتجوزة بقالي أربع سنين.
كنت عايشة مع جوزي طارق في شقة إيجار صغيرة في المقطم، حياة هادية على قد إيدينا، بس كنت مقتنعة بيها وسعيدة بكل تفصيلة فيها. ولما عرفت إني حامل بعد أربع سنين من الانتظار واللف على العيادات، حسيت إن الدنيا أخيراً ضحكت لي، وإن ربنا بعتلي العوض اللي هينسيني كل دمعة نزلت من عيني في السنين اللي فاتت.
في بداية الشهر السادس، حصلت أزمة مفاجئة في شغل طارق، وقال لي إن الشركة بتصفي حسابات واتأخرت مستحقاته كام شهر، واضطرينا نلم هدومنا ونسيب شقتنا ونروح نقعد فترة مؤقتة عند والدته في مصر الجديدة.
فترة مؤقتة…
الجملة دي كانت أكتر جملة بسمعها من طارق كل ما أشتكي من ضيق المكان أو توتر الجو.
– استحملي يا هدى، شهرين بالكتير وتفرج ونرجع بيتنا.
كنت بوافقه، أو يمكن كنت بجبر نفسي أصدقه عشان المركب تمشي وأحافظ على هدوء أعصابي عشان اللي في بطني.
حماتي إجلال كانت في أول أسبوعين بتغرقني كلام حلو واهتمام. قدام طارق كانت تمسك إيدي وتقول له:
– دي بنتي الغالية قبل ما تكون مراتك.
لكن بمجرد ما يلف ضهره ويخرج من باب الشقة، كانت ملامحها بتتبدل لواحدة تانية خالص.
– إنتي بتكسلي كتير أوي يا هدى.
– إنتي ليه بتتأففي من الأكل ده؟
– الدكتورة بتاعتك دي بتهول المواضيع وبتحب تاخد فلوس على الفاضي.
وكل ما تعدي جنبي تحط إيدها على بطني وتسألني بنظرة غريبة:
– ها.. لسه مفيش حركة جامدة؟
كنت أبتسم بهدوء وأرد:
– الحمد لله يا ماما، كله تمام.
فتمصمص شفايفها وتقول بنبرة فيها ترقب:
– ربنا يكمل على خير، المهم المرة دي يطلع ولد يشيل اسم العيلة.
كنت بطنش ومبحبش أعمل مشاكل من لا شيء، وكنت بقول لنفسي دي ست كبيرة ونفسها تفرح بحفيد.
لحد اليوم اللي رحت فيه أعمل سونار وعرفت إن الجنين بنت.
رجعت البيت وأنا طايرة من الفرحة، وأول ما دخلت قلت لإجلال وإحنا قاعدين في الصالة.
سكتت ثواني طويلة، بصت لي بصة معرفش أفسرها، وبعدين قالت بفتور:
بنت؟
وبعدها رسمت ابتسامة صفرا وقالت:
– خير وبركة… بكره ربنا يكرمكم بالولد.
من اللحظة دي، معاملتها اتقلبت مية وتمانين درجة.
بقت تراقبني في كل خطوة. قبل الغدا كل يوم كانت تصر إني أشرب كوباية منقوع أعشاب غامقة بتقول إنها وصفة قديمة بتقوي ضهر الحامل وتسهل الولادة.
وبعدها بيومين، دخلت عليا أوضتي ومعاها برطمان بلاستيك صغير جواه حبايات مدورة لونها أبيض مصفر.
طلعت حباية واحدة في إيدها ومدتها لي وقالت بثقة غريبة:
– ابلعي الحباية دي دلوقتي، وكل يوم الصبح بعد الفطار ليكي حباية زيها.
بصيت للحباية في إيدها باستغراب وتردد:
– إيه دي يا ماما؟
ردت وهي بتبص في عيني من غير ما يرف لها جفن:
– ده مكمل غذائي مستورد، واحدة صاحبتي بنتها دكتورة نسا كبيرة بتجيبه مخصوص للحوامل في الشهور الأخيرة.
قلت لها وأنا بسحب إيدي لورا:
– بس أنا متابعة مع دكتورتي وكاتبة لي فيتامينات وحديد وممنوع آخد أي حاجة من بره.
اتعصبت فجأة وقالت بصوت عالي:
– يعني أنا هضرك يا هدى؟ ده ابن ابني اللي في بطنك! دي حباية واحدة بتغذي العيل وبتثبت الحمل عشان ميتعبكيش.
في اللحظة دي دخل طارق من الشغل، فبصيت له بستنجد بيه.
– شوف يا طارق، ماما عايزاني آخد حبوب معرفش مصدرها إيه.
طارق ضحك ببرود وحط شنطته على الكرسي وقال:
– يا ستي اسمعي الكلام وخدي الحباية، أمي بتخاف عليكي أكتر من نفسك.
وسكت ومشي يدخل يغير هدومه.
ودي كانت الكارثة اللي وقعت فيها.
إني استسلمت لكلامهم وبلعت الحباية عشان ميتقالش عليا نكدية أو بشك فيهم.
عدى أسبوع، وبدأت أحس بأعراض غريبة عمري ما حسيت بيها طول شهور حملي.
تقل غريب في راسي وصداع بينقح في دماغي.
زغللة في عيني أول ما أقف.
ونهجان وضربات قلب سريعة كأني كنت بجري.
وكل ما أشتكي لإجلال، كانت تهز راسها وتقول:
– عادي يا بنتي، التقل ده طبيعي في السابع، إنتي بس اللي بتدلعي.
حتى طارق بقى يزهق من شكوتي ويرد بضيق:
– إنتي بتوهمي نفسك بالتعب يا هدى، بطلي وسوسة.
لكن اللي حصل يوم التلات الصبح مكنش وهم ولا دلع.
كنت واقفة في المطبخ بعمل كوباية شاي لطارق قبل ما ينزل، وإجلال لسه مدياني الحباية بتاعة الصبح وشربت وراها مية.
معدتش عشر دقايق، وحسيت إن الأرض بتلف بيا، ورجلي سابت ومبقتش شايلة جسمي.




