الفصل – الثامن
في لحظة كان آدم يحمل ميار بين يديه.
ميار: شايلني ليه… موديني فين.
لم يرد عليها آدم وفتح غرفته ودخل بها ثم أنزلها علي فراشه.
ميار: جبتني هنا ليه.
آدم: هششش… ممكن تسكتي… إنتي إنسانة مستهترة.
ميار بتعجب: أنا؟؟
آدم: أيوة أنتي… ومش عايز أسمع صوتك… ممكن؟؟
نظرت له نظرة طفولية ابتسم على هيئتها آدم فتهللت أساريره، عندما رأت ابتسامة ارتفعت دقات قلبها وتاهت هي في جماله وجمال ابتسامته.
ذهب آدم وأحضر صندوق الإسعافات الأولية وعاد إليها… جلس هو بعرض السرير ورفع رجليها علي وركيه وبدأ في تنظيف الموضع وتعقيمه ثم دهنه.
حينها أحست ميار أنها ستفقد الوعي من شدة الخجل والتوتر… أحست أن صوت دقات قلبها يسمعه آدم من قوته.
ترك آدم قدمها بهدوء ونهض وأخرج قرصاً من علبة آدم وناوله لميار.
ميار: إيه ده؟؟؟
آدم مازحاً: متخافيش مش هضرك… ده مسكن عشان الألم يهدي.
حينها تذكرت ميار يوم أن أتت إلي هنا وكانت تتلوي أرضاً من شدة الألم، وحينها رفض مساعدتها، آلمها قلبها لهذه الذكري وخانتها الدموع تتسابق في النزول.
حينما رأي آدم شرودها الذي تبعته دموعها منهمرة… علم جيداً فيما تفكر وما الذكريات التي راودتها… فجلس بجوارها علي السرير ثم اعتدل ممدداً رجليه… ورفع وجهها بأصبعه ثم طبع قبلة حانية علي يدها وقال: سامحيني… كل أمنيتي في الحياة.. انك تنسي الذكريات المؤلمة دي….
ميار: أنا كمان نفسي أنسي.
آدم وهو يناولها الماء لتبتلع القرص: عارفة ياميار… ان دول أصعب أيام مرت عليا في حياتي… رغم اللي حكيته لكي عن اللي حصل لأروي واللي عشته معاها ومن غيرها في الفترة الأخيرة… إلا أن احساسي بظلمك كان بيقتلني… تخليت ان اما اتجوزك وأرد اعتباري منك هرتاح… بس بالعكس نار رد الاعتبار كانت بتؤلمني أنا… فجذبها إلي أحضانه ومالت علي كتفه وقبل رأسها بحب، واستردف: سامحيني كل لحظة ألم كنت سبب فيها، سامحيني علي كل دمعة نزلت منك بسببي…
ارتمت في أحضانه باكية… ظل يمسح على رأسها حتي هدأت… ثم قالت وهي متشبسة بملابسه ومستنشقة عطره الرجولي: أول مرة في حياتي أحس بالأمان كده… أول مرة أحس إني مطمنة مش خايفة.
ضمها بقوة وأخذ يستنشق عبير شعرها بقوة، فقبل شعرها بحنان، ثم رفع وجهها… وأخذ يتأمل لؤلؤيتها البنتين في عينيها.. ولم يشعر بنفسه إلا وهو يلتهم شفتيها بين شفتيه… أغلقت هي أيضاً عيناها وتاهت في قبلته وكأنها تبث قبلتها من قلبها لا شفتيها… لا يعلما كم من الدقائق استمرا غارقين في بحر قبلتهما الأولي مغمضين العينين… حتي فتحت ميار عيناها وسحبت شفتاها وبعدت عنه بصعوبة وهي تلتقط أنفاسها الساخنة المتقطعة… حاول آدم جذبها ولكنه رأي الرفض علي وجهها الأحمر… حاولت ميار النهوض ولكنه أبدي الرفض بهزة رأسه.
قالت ميار بأنفاس متحشرجة: أنا هروح أنام مع أيتن.
آدم برجاء: رجاء ياميار خليكي هنا… نامي جمبي.
ميار: لا لا مش هينفع… انا وانت ياآدم عاملين زي شريطين السكة الحديد عمرهم ماهيتلاقوا… حياتنا مع بعض مستحيلة… وانت عارف كده.
اعتدل آدم جالسا: عارف كويس ياميار… بس بطلب منك اليومين اللي لسه لنا مع بعض تبقي ذكري حلوة.
ميار: كده أحسن خلينا بعيد. ثم قالت محرجة: أصل الأمور تتطور أكثر من كده ووو ساعتها….
قاطعها آدم: طب نامي جمبي النهاردة واوعدك اني مش هلمسك.
فكرت ميار برهة ثم قالت بحماس: موافقة بس بشرط.
ابتسم آدم: موافق علي كل شروطك… قولي.
ابتسمت ميار: خلاص اتفقنا… أقعد بقي ونتكلم.
آدم: إيه خير… شكل الموضوع كبير.
جلست ميار مربعة رجليها ثم قالت: الموضوع بخصوص أيتن.
آدم بمكر: قولي كده بقي… أيتن بتحب مهاب؟
ميار بدهشة: إيه ده… أنت عارف؟
آدم: طبعاً عارف ومن زمان كمان.
ميار: طب وبعدين.
آدم: وبعدين إيه… أقولك بقي الحقيقة.
ميار بترقب: هاااا…
آدم: هاتي بوسة وأقولك.
احمرت وجنتي ميار وأخفضت بصرها: خلاص مش عايزة أعرف.
آدم ضاحكاً: خلاص هقولك… مهاب بقي بيعشق أيتن.
ميار بفرحة: بجد؟؟؟
آدم: بجد… ومستني موافقتي عشان يعمل الخطوبة.
ميار: طب وانت مستني ايه… خليهم يتخبطوا… أختك مجنونة وبتحبه.
آدم: أنا موافق طبعاً… مهاب انسان اخلاقه عالية جدا… احنا متربين سوي وانا واثق فيه وفي حبه لأيتن… بس عايز اعذبها شوية عشان لو الشيطان دخل بينهم في يوم من الأيام يعرف انها وراها راجل… ويفكر الف مرة قبل مايضايقها.
ميار تبتلع غصة في حلقها: ربنا يخليك ليها… ويجعلك سندها دايماً.
أحس آدم بحزنها الذي تجلي علي وجهها فجأة، فجذبها لأحضانه: احنا هنفضل طويل الليل في سيرة جوز المعاتيه دول… انا عندي شغل بدري.
ميار متمنعة رافضه حضنه: احنا مش اتفقنا مش هتلمسني.
آدم يجذبها مرة أخري: ده حضن بريء والله… متقلقيش أنا مبخلفش وعدي.
استسلمت ميار لحضنه، فتابع آدم: اعملي حسابك أول مهاب وزفت اللي معاه ده يستلموا السكن هنرجع شقتنا تاني.
ميار: ليه بس انا مرتاحة هنا مع أيتن.
آدم: أنا عارف ان ماما بتضايقك… وانا مش عايز اي حاجة تزعلك.
ميار: والدتك ست طيبة بس مشكلتها إنها عصبية بس… وكمان أنا عذراها علي أي حاجة عملتها معايا… هي برضه أم.
قبل آدم رأس ميار: أنتي جايبة الطيبة والتسامح ده منين بس قوليلي… أنت عظيمة ياميار.
ميار: من ماما… وحشتني أوي ونفسي في حضنها.
أطبق آدم ذراعيه عليها: وأنا في أقرب وقت هخليكي تتواصلي معاها….
استسلمت ميار لأمانها وغطت في نوم عميق.
ظل آدم مستيقظاً طوال الليل ينعم بها بين أحضانه وكأنه لا يريد أن ينام وتفوته متعة لحظة هي فيها بقربه… ظل يفكر كيف سيعيش بعد أن تتركه… كيف ستسير حياته وهو أصبح يتنفس عشقها… تنهد بعمق وتذكر أروي وأمه ثم قال في نفسه: ليه كده يارب… الاختبار صعب عليا أوي.
مرت الأيام بروتينية شديدة… وعلاقة آدم بميار في تحسن… اعتاد كل منهما أن يجلسا يومياً يتسامران في كيف مر يومهما… كانت تحاول ميار بقدر الامكان أن تتفادي غضب نوال بتنفيذ كل متطلباتها… ونوال هي الأخري أصبحت تهدأ بعض الشيء من ناحيتها علي أمل أنها ستغادر وتبعد عن ابنها الذي تعلق قلبه بها… فأصبحت تري الحب يشع من عينيه عند رؤيتها.
جاء آدم يوماً من عمله مبكراً بوجه جاد… ودخل شقة والدته وطلب من ميار أن تحضر حقيبتها لأنهما سوف يعودان إلي شقة آدم… دخلت ميار لتفعل ماطلبه منها آدم… فحالته ووجه الصارم لايحتمل النقاش.
نوال: خير ياآدم… واخد ست الحسن وراجع ليه… اشتكت لك من امك.
أيتن: أدم أنا اتعودت على وجودها… مبقتش قادرة اعيش من غيرها… ارجوك سيبها.
آدم: ادخلي أوضتك دلوقتي ياأيتن… عايز ماما في كلمتين.
أيتن بزجر: حاضر.
نوال: فيه ايه ياآدم… ماتتكلم.
آدم: ايه اللي بينك وبين هشام ياماما.
نوال: مش فاهمة؟
آدم: لا فاهمة.
نوال: أنت عايز ايه… مش هترجعها لاهلها وتطلقها… لسه اسبوع… خلينا نخلص بقي.
آدم: وده مبرر أنك تقابلي هشام من ورايا.
نوال بعصبية: آدم… فوق لنفسك أنت مش هتحاسبني.
آدم بعصبية: لا ياماما هحاسبك… طالما الموضوع يخصني ويخص مراتي… ولو انتي فاكرة انك اما تقولي لهشام يرجع لها بعد مااسيبها اني هسمح بكده… تبقي غلطانة… ويكن في معلومك ياأمي… حتي لو رجعت لأهلها هفضل جمبها وسندها طول مانا عايش على وش الدنيا.
خرجت ميار من غرفة أيتن تحمل حقيبتها فتناولها منها آدم واحتضنتها أيتن: انا هنط لك كل شوية.
نظرت لوجه نوال وجدت الشرر يتطاير من عينيها… فخافت أن تودعها فتصب الغضب البادي علي وجهها عليها.
عادت ميار مع آدم الي شقته… وطوال الطريق لم يتحدث آدم بكلمة ولم تحاول ميار أن تتعدي حدودها وتخترق صمته.
