آدم: انا نازل.
ميار: هو انت لحقت…
آدم: أنا سيبت شغلي وجيت اجيبك هنا وراجع تاني.
ميار: رجعتني ليه… فيه حاجة؟
آدم: مفيش ياميار… انا هتاخر شوية عشان نازل موقع تنقيب… فيه تلفون محمول في درج مكتبي… لو احتجتي حاجة كلميني… وانا هبعتلك شوية حاجات مع دليفري السوبر الماركت…
ميار بحيرة: حاضر.
فتح آدم الباب ثم التفت إليها: خلي بالك من نفسك.
ميار: خلي بالك أنت من نفسك.
ابتسم لها ابتسامة من وسط انزعاجه البادي علي وجهه وغادر.
ظلت ميار حزينة وتدعو الله أن يخفف عنه حزنه وقلقه وييسر له أمره.
بعد حوالي ساعة رن جرس الباب… فعلمت ميار أنه عامل السوبر ماركت… فوضعت حجابها عليها وفتحت، ولكنها تفاجأت عندما وجدته هشام.
ميار بذهول: هشام!!!
هشام: ازيك ياميار… عاملة ايه؟؟
ميار: آدم مش موجود…
هشام: أنا جايلك أنتي…
ميار متعجبة: ايه الجنان ده… عايز مني ايه… وعرفت منين اني جيت الشقة؟؟؟
هشام: الجنان اللي عملته يوم مااتخليت عنك وسيبتك لواحد زي آدم ده يدمر حياتك.
ميار: اخرس ومتجبش سيرة آدم علي لسانك.
هشام: لسه بتدافعي عنه بعد اللي عمله فيكي وفي أهلك.
ميار: مش فاهمة عايز توصل لإيه يادكتور هشام.
هشام: انا عارف ان آدم هيرجعك مصر ويطلقك.
ميار: شيء ميخصكش ياهشام.
هشام: لا يخصني… مترجعيش مصر وآدم يطلقك وانا هتجوزك ياميار… أنا أولي بك.
ميار: لو آخر واحد في الدنيا مش هتجوزك ياهشام.
هشام: هترجعي لمين… لابوكي اللي ممكن يؤذيكي.
ميار بذهول: أنت عارف كل ده منين؟؟؟ انت وراك ايه ياهشام؟؟!
هشام: امك حكت لي كل حاجة… وفكرت ان انا اللي غلطت معاكي قبل ماتتجوزي… وطلبت مني اني اقول لزوجك بما اني كنت كاتب عليكي.
ميار بفزع: أمي… إزاي؟
هشام: هفهمك كل حاجة بس دخليني… هقف علي الباب كده؟؟
ميار: مقدرش ادخلك وآدم مش موجود.
هشام: انتي وفية بزيادة للشخص اللي ميستاهلش.
ميار: قولتلك الزم حدودك في الكلام عن آدم… وفهمني قابلت أمي إزاي وفين.
هشام: تاني يوم جوازك قابلت والدك بالصدفة في المستشفى كان باين عليه القلق… حاولت اتجاهله بس خفت ليكون جرالك حاجة… روحت وسألته وعرفت منه إن والدتك جالها أزمة قلبية… دخلت أشوفها لقيت حالتها خطيرة وعرفت منها انك اتجوزتي وجوزك قالهم انك… انك.
ميار: هااا وبعدين.
هشام: وعاتبتني ليه سيبتك رغم اللي عملته معاكي زي ماهي فاكرة وبدأت حالتها تسوء وتنادي عليكي وهي بتروح في الغيبوبة… فضلت في الغيبوبة يوم وبعديها ربنا رحمها من عذاب الدنيا.
ميار بصدمة: إيه اللي أنت بتقوله ده… أمي ربنا رحمها إزاي… بقت كويسة يعني وصحتها كويسة؟؟!!!
هشام: هو أنتي متعرفيش إن والدتك… توفاها الله.
ميار: مستحيل…. أمممي… ووقعت مغشياً عليها.
الفصل التاسع
عاد آدم من عمله في وقت متأخر… بحث بعينيه عنها في مدخل الشقة، فلم يجدها… دخل يغير ثيابه.. فتح النور وجدها تجلس القرفصاء علي السرير والجو مظلم تماماً من حولها.
اضاء نور الغرفة… ونظر إليها… وجد حالها يرثي له…. عينيها حمراء قطعتين من الدمع، ووجهها احمر من شدة البكاء، وشعرها اشعث و مبعثر بطريقة عشوائية، اقترب منها ادم بلهفة واحتضن وجهها بيديه: مالك يا ميار… إيه اللي عمل فيك كده؟؟؟
نظرت له ميار نظرة لو تفعل ما توحي بها لأردته قتيلاً…
تملك القلق من قلب آدم: رد عليا ياميار… مالك فيكي إيه؟؟؟
ميار بصوت صارم: أنت هترجعني مصر إمتي؟؟؟
آدم بتعجب: مستعجلة على إيه؟؟؟!!!
ميار بعينين يتطاير فيهما الشرر: أفضل لك وأفضل لي رجعني مصر.
آدم: إيه اللي حصل ياميار… فهميني.
ميار: انت لسه بتسال على اللي حصل… امي رحلت… امي رحلت… وانت السبب… ثم مسكته من ملابسه وهزته بقوة: انت السبب… ولو ما رجعتنيش مصر هخاصمك.. انا بكرهك… بكرهك… فاهم يعني إيه بكرهك.
صدم آدم مما سمعه ثم أدرك ماتقوله، فجذبها لأحضانه: اهدي ياميار… أكيد فيه غلط… انتي متأكدة من اللي أنتي بتقوليه ده؟
أبعدت نفسها عنه وقالت: أبعد عني… متلمسنيش… رجعني مصر…. رجعني مصر. قالت وهي منهارة من بين دموعها: أنا عمري ماهسمحك… أنت أكتر واحد جرحني وآلمني ووجعني وكسرني وكسر أهلي… أمي رحلت بسبب كسرتك ليا ولهم… أمي رحلت وفاكرة إن بنتها أخطأت… ياتري كانت زعلانة مني ولا زعلانة عليا… كان نفسي أحضنها… كان نفسي أقولها إنها كانت أحن واحدة عليا في الدنيا… نفسي أقولها إن دلوقتي حسيت مبقاش لحياتي لزوم… آآاااااااااااه ياأمي…… آااااااه.
دمعت عيني آدم وتركها تخرج مافي قلبها… لعل هذا يخفف عنها… تمني لو تتركه يأخذها في أحضانه حتي تهدأ حتي لو خاصمته بعدها، ولكنه فقط يريد أن يواسيها، يخفف عنها، ولكنه تسأل كيف له أن يواسيها علي جرحاً هو من حفره، كيف له أن يداوي ألماً هو من تسبب فيه.
نظرت له وقالت بهذيان: تعرف إني كرهت مراد أخويا ده… وبتمني آخد تاري منه… لأنه هو السبب في وجودي هنا دلوقتي…. بس خد بقي يابشمهندس الحقيقة المرة… إنت زيك زيه… لا أنت أبشع منه…. آه والله زي مابقولك كده… هو أخذ واعتدى… انت كمان أخذتني من أهلي وأسأت الظن بي وكسرت أهلي وأخذت سعادتهم. ثم أكملت بصراخ: وكنت سبب في رحيل أمي… وأنا مش مسامحاك…. بكرة ترجعني مصر… ومش عايزاك معايا… مبقتش محتاجة أحسن صورتي قدام حد… هروح أنام تحت رجلين أبويا واطلب منه السماح… ولو حب يخاصمني يبقي عمل فيا معروف…. عارف ليه ناره ولا جنتك…. ربنا ينتقم منك علي كل اللي عملته فيا… حسبي الله ونعم الوكيل فيك…. ثم بدأ صوتها ينخفض بعض الشيء حتي غابت عن الوعي.
اقترب منها ادم بلهفة وبدأ في هزها: ميار… ميار…. ردي عليا.
ثم أخرج هاتفه وضغط علي رقم مهاب (رنين دون إجابة) لم يمل آدم من الاتصال حتي أجاب مهاب: ايه ياعم حد بيتصل….
قاطعه آدم: مهاب… ارجوك ميار أغمي عليها… تعالي حالا.
مهاب: اهدي… دقايق هبقي عندك.
نام بجوارها وجذبها لأحضانه وبدأ يمسح على شعرها ووجهها وقال بصوت مختنق: كل كلمة قولتيها عندك حق فيها…. فوقي بس وأنا هعملك كل اللي يريحك لو علي حساب نفسي… فوقي ياميار… أنا بحبك… بحبك…. والله العظيم بحبك….. ثم قبل رأسها وبكي واكمل من بين دموعه: يمكن قدرنا وظروفنا القاسية جمعتنا… بس يمكن ربنا أراد كده عشان نتجمع… كنت لسه النهاردة بتخيل آخدك مصر واعملك فرح كبير زي ماكل بنت بتتمني وأبدأ معاكي حياة جديدة بعيد عن الماضي اللي عشناه وعن ظروفنا اللي أجبرتني أبدأ حياتي معاكي بشكل صعب… ونعيش حياة سعيدة أعوضك عن كل دمعة وذرة حزن عشتيها… بس مش عارف ليه القدر دايما بيعاندني.
قطع حديثه جرس الباب… نهض وفتح الباب وجده مهاب… ادخله عليها الغرفة وبدأ في فحصها بعناية وقال لآدم: حصل حاجة ياآدم… ايه اللي عمل فيها كده… واضح ان عندها انهيار عصبي.
آدم بحزن: فعلا كانت منهارة… عرفت النهاردة ان والدتها رحلت. وفجأة تساءل آدم في نفسه: بس عرفت منين وإزاي…. ترك مهاب يستكمل فحصه لها وذهب غرفة مكتبه وفتح احد الادراج وجد الهاتف الذي أخبرها عنه مكانه… فتحه لم يجد أي تواصل بينها وبين أحد…. فتح جهاز الكمبيوتر الذي لديه وبدأ في إرجاع تسجيل الكاميرات منذ مجيئه بها الي الشقة اليوم.
وبينما هو يسترجع التسجيلات ناداه مهاب: آدم… آدم.
ترك مافي يده وخرج لمهاب الذي وجده يغلق عليها باب الغرفة وقال: شوف ياآدم… مراتك محتاجة هدوء وأعصاب هادية… فحاول تحتويها… أنا اعطيت لها مهديء خفيف كده عشان أنا شاكك في حاجة علي اما تفوق ونتأكد.
آدم بقلق: شاكك في إيه… طمني؟؟؟
مهاب: اهدي ياعم انت بقيت عامل ليه كده…. هي مقالتش لك انها شاكة انها حامل؟
آدم: لا مقالتش… هو ممكن يعني….
مهاب: ممكن إيه بتقطع ليه كده… انطق.
آدم: ممكن الست تحمل يعني… يعني من مرة واحدة بينها وبين جوزها.
مهاب بشك أن الحديث يخص آدم: ممكن طبعا وبتحصل كتير كمان.
آدم بحماس: طب ادخل اتأكد ياللا…
مهاب: خلاص لسعت منك…. مينفعش اما تبقي تفوق وممكن تعمله في البيت عادي باختبار منزلي.
آدم بتصميم: اتصرف يامهاب واعرف دلوقتي… شوف طريقة تانية قبل مالنهار يطلع.
مهاب بمكر: عندي حل تاني وهجيبلك التحاليل بعد ساعتين بس بشرط… انا وأيتن نلبس الدبل.
آدم: خطوبتكم آخر الأسبوع… اخلص بقي.
دخل مهاب سعيداً لموافقة آدم وأخذ منها عينة طبية في حقنة بلاستيكية وخرج وقال لآدم: استني مني مكالمة بقي ياأبو نسب.
آدم: متتاخرش عليا يامهاب.
مهاب: حاضر… سلام.
دخل ادم الحمام وتوضأ ودخل غرفة مكتبه يصلي ويسجد ويرمي كل همومه بين يدي الله… حينها أحس أن الثقل الذي يحمله قد خف… وأن بعده عن الله هو سبب كل هذه المشاكل والنزاعات في حياته…. دعا الله أن يحفظ له ميار ويختار له مافيه الخير… كما دعا من قلبه أن يصدق حملها ليكون بينهما رابط أبدي.
دخل عليها وجدها مستغرقة في النوم ووجهها المنتفخ من البكاء قد هدأ… اقترب منها وقبلها بجانب شفتيها بحب وقال لها: هعمل المستحيل عشان تسامحيني وتفضلي جمبي… وهستحمل أي حاجة منك وهصبر لو لآخر عمري لحد مانعيش سوي ونكمل حياتنا… ولو مهاب جاب البشري يبقي ربنا أعطاني الإشارة اني مسيبكيش تسافري وتسيبيني.
تذكر فجأة تسجيلات الكاميرا ثم عاد إلي المكتب وفتح الجهاز وأكمل ما بدأه…. كادت عيناه تخرج من موضعهما عندما وجد هشام جاء بعد مغادرته بساعة… حينها علم أن هشام وراء كل ماحدث وهو من أخبر ميار برحيل أمها… ثم جاء في باله أنه من الممكن أن تكون أمها على قيد الحياة وهو من يريد الوقيعة بينها وبينه.
أمسك هاتفه بعصبية: أيوة يامهاب….
مهاب: يابني قولتلك ساعتين لس….
قاطعه آدم: هشام فين يا مهاب… في السكن ولا عنده شغل؟؟؟
مهاب: لا نايم بيشخر في السكن… معندوش حد يقلق منامه زيك ياعملي الردي.
أغلق آدم الخط دون أن ينهي مهاب حديثه وأخذ هاتفه ومفاتيح سيارته واتجه بها إلي السكن الذي يقيم فيه هشام ومهاب… رن جرس الباب عدة مرات حتي فتح هشام وهو يتثاءب وقبل أن يلفظ كانت دفعة آدم قد أبعدته في الحائط خلفه….
آدم: هعملك يا******* ازاي تتهجم علي بيوت الناس ورجالتها مش موجودة.
