
… نهى؟ إنتي إيه اللي جابك هنا؟ عرفتي مكاني إزاي؟
نهى وقفت ببطء، وبصت له باحتقار يموت وقالت:
جاية أطمن على فلوسي يا طارق.. وجاية أشوف التمثيلية الرخيصة اللي عيشتنا فيها إحنا الاتنين. كنت فاكر إنك أذكى مننا؟ تاخد مني الفلوس والمنصب والعربيات، وفي نفس الوقت تحبس البنت الغلبانة دي في وهم وتسممها بالبطيء عشان تحافظ على القرشين؟ مبروك عليك يا أستاذ.. العقد اتلغى، والشرط الجزائي هيتنفذ على كل مليم تملكه.
طارق قرب من السرير بخطوات مهزوزة، وعينيه بتتنقل برعب بيني وبين نهى وهو بيحاول يلملم شتات نفسه:
هدى.. متصدقيش كل الكلام ده.. هي بتكبر الموضوع عشان تنتقم مني.. أنا كنت مضغوط.. الديون كانت هتوديني في داهية والشرط الجزائي كان هيدمرني.. أنا عملت كده عشان أحافظ على بيتنا وعشان أأمّن مستقبلنا!
تحافظ على بيتنا؟! الصوت طلع مني عالي وقوي، صوت واحدة اتداس على قلبها لحد ما مات الخوف جواها، واتولد مكانه إصرار غريب عمره ما كان في شخصيتي الهادية. شديت إبرة المحلول من إيدي بقوة خلت نقطة دم تنزل على الملاية والممرضة اللي دخلت على الصوت تصرخ، وقفت على رجلي وسندت على حرف السرير وبصيت في عينه مباشرة من غير ما أرمش:
تحافظ على بيتنا بإنك تـ.ـقـ.ـتـ.ـل بنتك؟ تحافظ على بيتنا بإنك تدمر صحتي أربع سنين وتخليني أعيط كل ليلة وأقول العيب فيا وأبوس إيدك عشان متتجوزش عليا؟ إنت مش إنسان.. إنت أرخص وأقذر مخلوق شفته في حياتي.
طارق مد إيده يحاول يمسك دراعي وهو بيترجاني بدموع تماسيح:
هدى.. أبوس إيدك اسمعيني.. بلاش نهد حياتنا عشان غلطة.. أنا هصلح كل حاجة..
زقيته بكل قوتي لدرجة إنه اتكعبل في شنطة الفاكهة ورجع لورا خبط في الباب:
حياتي معاك انتهت من اللحظة اللي مديت فيها إيدك بالسم في كوبايتي يا طارق!
بصيت ناحية الباب، لقيت ظابط شرطة واتنين أمناء داخلين مع الدكتورة، بعد ما البلاغ الرسمي اتحرك ووصلت القوة للمستشفى للتحقيق في واقعة التسميم. الدكتورة شاورت على طارق وقالت بحزم:
هو ده الزوج والمتهم يا فندم، والتحاليل والبرطمان اللي في جيبه يثبتوا كلامي.
طارق وشه اتخطف، وبص لأمه بترجي وذل، من غير ذرة رجولة ولا رحمة:
أمي.. قوليلهم إنك إنتي اللي جبتي الحبوب من عند العطارة.. قولي إنها كانت وصفة بلدي ومكنتيش تقصدي.. أنا ابنك وحيدك يا أمي متضيعينيش!
إجلال بصت لابنها اللي بيبيعها في ثانية عشان ينفد بجلده، ولأول مرة دموعها كانت دموع ندم حقيقي وقهر.. مسحت وشها بطرحتها وبصت له بقرف وقالت للظابط بصوت عالي واضح:
أنا ست جاهلة يا بيه، وربنا يحاسبني على غلطي وجهلي.. لكن عمري ما أغطي على واحد بيـ.ـقـ.ـتـ.ـل ضناه ويبيع أمه عشان الفلوس. هو اللي وزني، وهو اللي كان بيحط لها السم في بيته بقاله سنين.. أنا هقول قدام النيابة كل حرف أعرفه ومش هرحمه!
الظابط قرب وحط الكلبش الحديد في إيد طارق وهو بيصرخ وبيستنجد بنهى:
نهى! كلمي المحامي بتاعك.. متسيبينيش كده.. أنا جوزك!
نهى مسكت موبايلها ببرود وقالت له وهي بتبص في عينه:
المستشار القانوني للشركة بيعمل فيك محضر تاني دلوقتي حالا بتهمة التلاعب في الحسابات واختلاس عهدة مالية.. حسابك معايا مش هنا يا طارق، حسابك ورا القضبان.
خرجوا بيه من الأوضة، وصوته وهو بيصرخ وبيترجى كان بيختفي في آخر الطرقة، لحد ما الهدوء رجع للمكان. نهى بصت لي نظرة طويلة، لأول مرة كان فيها لمحة احترام، وحطت كارت شخصي على الترابيزة اللي جنبي:
أنا مش ملاك.. بس مبرضاش بالظلم ولا الغدر. لو احتجتي أي شهادة قدام النيابة أو في قضية الطلاق للضرر، محاميّ الخاص هيتولى كل الإجراءات على حسابي.. وحقك هتاخديه تالت ومتلت. لفت ضهرها ومشيت.
فضلت واقفة مكاني، وإجلال قاعدة على الأرض جنب الباب بتعيط بصوت مكتوم ومكسورة من الخزي، مش قادرة حتى ترفع عينها في عيني بعد ما خسرت ابنها وضميرها في يوم واحد. الدكتورة قربت مني، ساندتني بحنية لحد ما رجعت قعدت على السرير، وحطت جهاز السونار على بطني عشان تطمن على الجنين بعد الانفعال والمجهود ده كله. ثواني مرت عليا كأنها سنين.. وبدأ الصوت يملى الأوضة. دقات قلب منتظمة وقوية.. سريعة ومليانة حياة. الدكتورة ابتسمت بفرحة ودموع في عينيها وقالت:
بنتك عنيدة زيك يا هدى.. عدت مرحلة الخطر، ومتمسكة بالحياة عشان تعيش معاكي.
حطيت إيدي الاتنين على بطني، وحسيت بنبضها بيديني طاقة وأمان عمرهم ما كانوا عندي. دموعي نزلت، بس المرة دي مكانتش دموع وجع ولا انكسار.. كانت دموع ميلاد جديد وبداية حرة من غير خوف ولا خداع.
د سبع شهور، كنت قاعدة في البلكونة في شقة صغيرة مشمسة في بورسعيد، نسمة البحر الهوا فيها يرد الروح، وصوت النوارس بيملى السما الصافية، وفي حضني بنتي «ليلى» ملفوفة في بطانيتها البيضا. طارق اتحكم عليه بسبع سنين سجن مشدد في قضية الشروع في القـ.ـتـ.ـل والتسميم العمد، غير أحكام الاختلاس اللي نهت مستقبله للأبد وجردته من كل حاجة. وإجلال عاشت بقية أيامها وحيدة في شقتها، بتدفع تمن قسوتها وجهلها بالوحدة والندم. بصيت لملامح بنتي وهي بتضحك في نومها، وابتسمت بهدوء. الحباية اللي كانوا فاكرين إنها هتنهي حكايتي، كانت السبب في إني أكتشف الحقيقة وأنقذ نفسي وبنتي، وتبدأ من بعدها أجمل حياة كنت بحلم بيها.
الكاتبة نرمين عادل همام
تمت




