
الدكتورة ضربت بإيدها على المكتب وقالت بحزم:
– صوتكم ميعلاش هنا! أنا اللي يهمني دلوقتي حياة الأم والجنين. نبض البنت ضعيف جداً، وإحنا حطيناها تحت الملاحظة وبنعمل غسيل دم ومحاليل عشان نطرد السموم دي. وبحكم القانون، أنا بلغت نقطة شرطة المستشفى، لأن دي جريمة شروع في قـ.ـتـ.ـل وتسميم عمد.
أول ما سمع كلمة شرطة، طارق انهار تماماً. جري على السرير وركع على ركبته ومسك إيدي بإيدين متلجة وهو بيعيط بحرقة:
– هدى.. أبوس إيدك اسمعيني.. بلاش فضايح وبوليس.. أمي ست جاهلة واتضحك عليها، وأنا.. أنا هشرح لك كل حاجة بس نلم الموضوع ونخرج من هنا، عشان خاطر العشرة اللي بينا يا هدى!
بصيت لوشه اللي كنت بشوفه أمان الدنيا، فجأة شفت قناع بيقع وبيكشف وراه وحش أناني.
شديت إيدي من إيده بقوة واشمئزاز:
– إنت كنت عارف يا طارق؟
وطى راسه ومردش.
– انطق! إنت اللي كنت بتحطلي النقط في العصير والشاي في شقتنا قبل ما نيجي عند أمك؟
غمض عينه وصوته طلع مكسور ومخنوق:
– غصب عني يا هدى.. إنتي متعرفيش أنا كنت مربوط إزاي.. مكنش قدامي حل تاني!
الدكتورة نادت على أفراد الأمن عشان يطلعوهم بره الأوضة لأن ضغطي علي جداً، وركبوا لي محاليل تانية ومهدئ خفيف.
فضلت طول الليل صاحية، دموعي مبتقفش، وحاطة إيدي الاتنين على بطني بدعي ربنا من قلبي:
– يا رب احميها.. خليكي قوية يا بنتي، إنتي اللي فاضلة لي في الدنيا دي.
تاني يوم الصبح بدري، دخلت الممرضة تطمن عليا وتقيس الضغط. بصت لي بتعاطف وقالت بصوت واطي:
– يا مدام، جوزك اختفى من الفجر ومحدش شافه، بس والدته نايمة على الكرسي بره من بالليل، وجابت لك شنطة هدومك معاها.
استغربت.. جابت شنطة هدومي ليه؟
قلت للممرضة تدخلها، مش عشان أسامحها، لكن عشان قلبي كان حاسس إن ورا سكوت طارق مصيبة أكبر من اللي اتكشفت.
إجلال دخلت وهي موطية راسها، وشها دبلان وعينيها وارمة من العياط. حطت الشنطة جنب السرير وقعدت على طرف الكرسي وقالت بصوت مبحوح:
– أنا عارفة إني أذيتك يا هدى، وربنا هيعاقبني على جهلي وعمى قلبي.. بس والله ابني مكنش بيعمل كده عشان بيكره الخلفة.. طارق كان بيقول لي إنه بيعمل كده عشان يحميكي ويحمي نفسه.
بصيت لها بقرف وقلت:
حميني بإنكم تموتوني أنا وبنتي؟
قربت مني وفتحت السوستة الداخلية في شنطة هدومي، وطلعت منها ظرف أصفر كبير متطبق بعناية.
مدتهولي وإيديها بتترعش:
– الظرف ده لقيته متخبي جوه دولاب طارق القديم في أوضته لما رحت ألم هدومك الفجر.. افتحيه يا بنتي، واعرفي الحقيقة اللي ضيعت عمرك معاه.
فتحت الظرف بإيد بتترجف، وطلعت الورق اللي جواه.
مع أول سطر قريته، حسيت إن النفس اتقطع من صدري، وعيني ثبتت على الورقة من هول الصدمة…يتبع



