
ج الاخير حباية واحدة كشفت كل حاجة للكاتبة نرمين همام
فتحت الظرف بإيد بتترجف، وطلعت الورق اللي جواه.
مع أول سطر قريته، حسيت إن النفس اتقطع من صدري، وعيني ثبتت على الورقة من هول الصدمة…
الورقة كانت قسيمة جواز رسمية بتاريخ من ست سنين فاتوا! طارق متجوز قبلي، ومراته مش ست عادية.. دي صاحبة مجموعة الشركات اللي طارق بيشتغل فيها مدير مالي! ومدبس مع القسيمة ملحق عقد شراكة وعمل موقع عليه طارق بخط إيده، مكتوب فيه نصاً:
يلتزم الطرف الثاني بعدم الإنجاب من أي زيجة أخرى طوال فترة سريان هذا العقد، وفي حالة ثبوت حمل أو إنجاب مولود خارج هذا الزواج، يسقط حقه في الأرباح فوراً ويلتزم بسداد الشرط الجزائي البالغ خمسة ملايين جنيه.
مسكت الورقة بإيدين بترتعش، وعيني بتعيد قراية السطور مرة واتنين وتلاتة كأني مش عارفة أفك الخط. التاريخ.. الاسم.. التوقيع.. كل حاجة كانت حقيقية لدرجة توجع. أربع سنين من عمري، كل ليلة كنت بنام فيها مكسورة الخاطر وأنا بدعي ربنا يرزقني، كل إبرة أخدتها، كل تحاليل عملتها، كل مرة طارق طبطب على ضهري وقال لي «ربنا هيكرمنا»، كان في الحقيقة بيشتري بدموعي وبصحتي ملايينه ومنصبه! حسيت إن الأوضة بتضيق بيا، وإن الهوا اللي بتنفسه مسموم زي النقط اللي كان بيدسهالي في كوبايتي.
في نفس اللحظة دي، شاشة موبايلي نورت باسم طارق، وقبل ما أمد إيدي، باب الأوضة اتفتح بهدوء، ودخلت ست في أواخر التلاتينات، لابسة تايير أنيق جداً بلون كحلي غامق، ونضارة شمس غالية، واقفة تبص لي بثبات وبرود غريب وقالت:
حمد الله على سلامتك يا ضرتي.
رفعت نضارتها وحطتها في شعرها، وبصت لي نظرة فاحصة من فوق لتحت من غير ما يبان عليها أي توتر. ملامحها حادة، ووقفتها فيها ثقة ست متعودة تتحكم في كل اللي حواليها، ريحة برفانها القوية غطت على ريحة المستشفى والمطهرات في ثانية.
أنا نهى.. شريكة طارق في الشغل، ومراته على سنة الله ورسوله من ست سنين.
كنت ببص لقسيمة الجواز اللي في إيدي، وأبص لها هي، وعقلي مش قادر يربط الخيوط ببعض. صوتي طلع بالعافية، مبحوح ومخنوق من الصدمة:
ست سنين؟ يعني كنت متجوزك قبل ما يتقدم لي بسنتين؟ طب إزاي؟ وليه؟
نهى سحبت الكرسي الجلد اللي جنب السرير وقعدت، وحطت رجل على رجل وقالت بهدوء مستفز وهي بتلعب في دبلتها الماس:
طارق مكنش يقدر يعيش من غير فلوسي ولا مستواه الاجتماعي اللي أنا عملتهوله، بس في نفس الوقت كان عايز واحدة بسيطة ترضي أمه وتعيشه دور سي السيد اللي ميعرفش يعمله معايا. أنا ست بتاعة شغل وأرقام، مبحبش الخلفة ولا وجع الدماغ، ولما جه يطلب يتجوزك، حلف لي إنه جواز على الورق عشان أمه تعبانة ونفسها تشوفه عريس قبل ما تموت. وأنا عشان أضمن إن مفيش عيل ييجي يشاركني في ثروتي واسم شركاتي، اشترطت عليه يكتب الشرط الجزائي ده ويمنع الخلفة تماماً.. ومكنتش أعرف إنه هيوصل للدرجة دي من الخسة عشان يحافظ على العقد.
إجلال قامت وقفت فجأة من مكانها، وشها احمر وصوتها اتخنق بالدموع:
كدابة! إنتي بتفتري على ابني! طارق كان نفسه في حتة عيل يشيل اسمه، وأنا اللي كنت بلح عليه، وأنا اللي…
نهى قاطعتها بنظرة سخرية باردة خلت إجلال تبلع بقية كلامها:
إنتي يا حاجة كنتي مجرد الستارة اللي بيغطي بيها جريمته. افتكري كويس كان مين بيجيب لك أرقام الستات بتوع الوصفات البلدية، ومين كان بيفتح قدامك سيرة إن البنت مبتشيلش اسم العيلة! ابنك هو اللي كان بيحط لهدى النقط في الأكل والشرب بقاله أربع سنين عشان يضمن إن مفيش حمل يحصل ويفضل يقبض مرتبه وأرباحه مني كل شهر.. ولما ربنا أراد وحصل الحمل غصب عنه، خاف يبان قدامي أو يتكشف أمره بعد ما وصلتني أخبار من ناس تبعي إن مراته التانية حامل في السابع، فاستغل لهفتك على الولد وسخنك لحد ما خلاكي تروحي تجيبي حباية الإجهاض بإيدك عشان لو حصلت مصيبة تلبسيها إنتي لوحدك ويطلع هو منها زي الشعرة من العجين!
الكلام كان نازل على إجلال زي السكاكين، حطت إيديها الاتنين على وشها وبدأت تترعش وهي بتفتكر كل كلمة طارق قالهالها في الأسابيع اللي فاتت، وإزاي ساقها زي العمياء عشان ينفذ خطته القذرة بإيديها هي.
قبل ما إجلال ترد، باب الأوضة اتفتح بعنف خبط في الحيطة. طارق دخل وهو بيلهث، وشه شاحب وأصفر، وماسك في إيده شنطة فاكهة وعلب عصير. أول ما شاف نهى قاعدة بكل هدوء، والورق الأصفر مفرود على السرير قدامي، وأمه منهارة من العياط على الكرسي.. الشنطة وقعت من إيده واتبعثرت الفاكهة والعصير على الأرض، ووقف متسمر في مكانه كأنه اتشل.




