
ضحكت وصفقت، وأنا فضلت واقفة مكاني.
مش عشان الغويشتين، والله ما كان فارق معايا تمنهم، لكن عشان الإحساس اللي وصلني في اللحظة دي.
حسيت إني مش موجودة.
حسيت إن كل حاجة في الليلة دي معمولة عشان أمه، وأنا مجرد ضيفة في فرحها.
قعدت طول الوقت ماسكة دموعي، ومستنية الفرح يخلص.
وفعلًا خلص.
ركبنا العربية، وحماتي ركبت جنبنا ورا، وأنا كنت قاعدة على الطرف ومش عارفة أتحرك براحة.
طول الطريق كانت بتتكلم مع كريم عن الفرح، وعن مين حضر ومين مرقصش معاها، وأنا ساكتة وببص من الشباك.
وصلنا البيت وطلعنا الشقة.
كنت متخيلة إن أخيرًا هنبقى لوحدنا، وإن اليوم الطويل ده هيخلص ونبدأ حياتنا.
لكن بعد دقايق سمعت خبط على الباب.
كريم فتح، ولقيت حماتي واقفة.
قالت بمنتهى الطبيعية
أنا جعانة، هآكل معاكم وبعدها هدخل أنام.
بصيت لكريم مستغربة، وهو ابتسم وقال
معلش يا مريم، أصل ماما تعبانة من الفرح.
دخلت حماتي وقعدت على السفرة، وبدأت تفتح الأكل اللي ماما كانت مجهزاه.
قالت
الله! إيه الجمال ده، واضح إن أمك تعبت في الأكل.
قلت
أيوه، ماما مجهزاه مخصوص.
ردت
ربنا يخليها، بس بعد كده أنا اللي هظبط أكل البيت، عشان كريم متعود على أكلي.
بصيت لكريم، لقيته بيقول
طبعًا يا ماما، ده أنا مقدرش أعيش من غير أكلك.
ضحكت حماتي، وبعدين بصتلي وقالت
إنتِ بقى يا مريم، لازم تتعلمي إن جوزك ليه نظام معين، وأنا هساعدك في كل حاجة.
قلت بأدب
إن شاء الله.
خلصنا الأكل، وكنت فاكرة إنها هتمشي.
لكنها قامت وقالت
أنا هنام هنا الليلة دي، أصل رجلي واجعاني ومش قادرة أنزل السلم.
كريم قال بسرعة
نامي يا ماما، أوضتنا مفتوحة.
أنا اتجمدت.
أوضتنا؟
بصيتله وقلت
طب وإحنا؟
ضحك وقال
إيه يا بنتي، دي أمي! هنسيبها تنزل وهي تعبانة؟
حماتي دخلت أوضة النوم، وبدأت تفتح الدولاب وتطلع هدومها اللي كانت حطاها فيه من يوم الفرش.
وبعدين قالت
أنا هنام على السرير، ضهري واجعني، وإنتوا شوفوا الكنبة اللي في الصالة.
حسيت إن الأرض بتتهد من تحتي.
بصيت لكريم، وقلتله بصوت واطي
إنت موافق على الكلام ده؟
رد بضيق
مريم، مش وقت الكلام ده، أمي تعبانة.
قلت
بس دي أول ليلة لينا.
قال
وبعدين؟ هو إنتِ هتعملي مشكلة عشان أمي؟
سكت.
مش عشان مقتنعة، لكن عشان كنت مصډومة.
قعدت على الكنبة في الصالة، وفضلت باصة للسقف لحد ما الفجر طلع.
وفي الصبح، صحيت على صوت حماتي وهي بتفتح باب الأوضة وبتنادي
يا كريم، يا حبيبي، قوم عشان تفطر قبل ما تنزل.
دخلت المطبخ ولقيتها بتعمل الفطار، وبتحط الأكل في الطبق اللي بتحبه.
كريم خرج من الأوضة، وأول ما شافها ابتسم
صباح الخير يا ست الكل.
قالت
صباح النور يا قلب أمك، تعال افطر.
قعد ياكل، وأنا وقفت في المطبخ مش عارفة أبدأ يومي إزاي.
حماتي بصتلي وقالت
إنتِ لسه نايمة؟ قومي رتبي الأوض، أنا مش هفضل طول عمري أخدمكم.
بصيتلها باستغراب
أنا كنت بجهز الفطار.
قالت
خلاص، أنا عملته، بعد كده اتعلمي تعمليه بدري.
كريم كان سامع، لكنه ما قالش حاجة.
بعد ما نزل، حماتي فضلت قاعدة في الشقة.
كنت فاكرة إنها هترجع شقتها، لكنها قالتلي
أنا هقعد معاكي النهارده عشان أعلمك نظام البيت.
بدأت تفتح الأدراج وتغير أماكن الحاجات.
كل حاجة كنت حطاها في مكان، كانت تنقلها لمكان تاني.
ولما سألتها ليه، قالت
أنا عارفة كريم بيحب حاجته فين.
في الظهر، ماما اتصلت بيا.
صباح الخير يا عروسة، عاملة إيه؟
كنت عايزة أعيط، لكن قولتلها
الحمد لله يا ماما، كله تمام.
سألتني
كريم عامل معاكي إيه؟
قلت
كويس.
قالت
طب وحماتك؟
بصيت ناحية الصالة ولقيتها بتسمعني.
قلت
ماما، هكلمك بعدين.
قفلت بسرعة.
حماتي بصتلي وقالت
إنتِ بتشتكي لأمك مني؟
قلت
لا طبعًا.
قالت
بصي يا مريم، أنا ست كبيرة، وعشت مع ابني سنين طويلة، ومش هقبل إن واحدة تيجي تاخده مني.
الكلام ده وقع عليا زي الصاعقة.
قلت
أنا مش جاية آخده منك، ده ابنك قبل ما يكون جوزي.
ابتسمت ابتسامة غريبة وقالت
خليكي فاهمة الكلام ده كويس.
عدت الأيام الأولى، وكل يوم كان بيحصل موقف جديد.
حماتي بقت تدخل الشقة من غير ما تخبط.
مفتاح الشقة كان معاها، وكانت بتدخل في أي وقت.
لو لقتني قاعدة مع كريم، تطلب منه ينزل معاها.
لو عملت أكل، تقول إن كريم مش بيحب النوع ده.
لو اشتريت حاجة للبيت، تقول إني بصرف فلوس على الفاضي.
ولو لبست حاجة جديدة، تسألني
إنتِ خارجة فين باللبس ده؟
وكريم كل مرة كان عنده نفس الرد
معلش يا مريم، أصل ماما اتعودت عليا.
بعد أسبوع من الجواز، ماما جهزتلي الغدا وبعته مع أخويا الصغير.
أول ما حماتي شافت الأكل، قالت
إيه ده؟ هو بيتنا ناقص أكل؟
قلت
ماما بعتتهولي.
قالت
خلاص، رجعيهولها، إحنا مش محتاجين حاجة من حد.
قلت
دي أمي يا طنط، وبتحب تطمن عليا.
ردت
وأنا أم كريم، ومن حقي أكون مسؤولة عن أكله.
وفي اللحظة دي دخل كريم، وسمع آخر جملة.
قلتله
كريم، أنا مش فاهمة ليه كل حاجة بتتحول لمشكلة؟
رد
عشان إنتِ بتكبري المواضيع.
سكت تاني.
لكن اللي حصل بعد كده كان أكبر من إني أقدر أسكت عليه.
في اليوم العاشر من جوازنا، كنت قاعدة في الصالة، وحماتي دخلت ومعاها شنطة كبيرة.
قالت
قومي يا مريم، أنا هحط شوية حاجات هنا.
سألتها
حاجات إيه؟
قالت
هدومي، أنا هبات عندكم كام يوم.
استغربت
ليه؟ حضرتك تعبانة؟
قالت
لا، بس أوضة نومي عندي فيها شغل تصليحات، وهقعد هنا مؤقتًا.
قلت
طب ما تقعدي في أوضة الضيوف اللي تحت عند حضرتك؟
بصتلي بحدة
إنتِ بتطرديني من بيت ابني؟
قلت بسرعة
لا والله، بس أنا كنت فاكرة إنك هتكوني في شقتك.
ردت
الشقة دي في بيتي، وأنا اللي مجهزاها لابني، ولو مش عاجبك الوضع تقدري تتكلمي مع جوزك.
وبالفعل، لما كريم رجع بالليل، كلمته.
قلتله
أنا عايزة أفهم، مامتك هتقعد معانا قد إيه؟
قال
لحد ما التصليحات تخلص.
قلت
طيب وإمتى هتخلص؟
رد
مش عارف، أسبوعين، شهر، على حسب.
قلت
كريم، أنا مش ضد وجود والدتك، لكن أنا محتاجة خصوصية، إحنا لسه متجوزين.
اتنهد وقال
هو إنتِ ليه بتفكري في نفسك بس؟ ماما لوحدها، وأنا ابنها الوحيد.
قلت
وأنا مراتك، ومن حقي يكون ليا بيت.
بصلي وقال
الشقة دي في بيت عيلتي، وماما صاحبة البيت، يعني مش هنعمل فيها قوانين من عندنا.
الجملة دي فضلت ترن في ودني طول الليل.
بعد يومين، حماتي بدأت تتدخل حتى في لبسي وأكلي ومواعيد نومي.
كانت بتقول لكريم إني مش بعرف أعمل حاجة، وإنها هتعلمني الأصول.
وفي يوم، كنت بكلم ماما في التليفون، وفجأة حماتي خطفت مني الموبايل وقالت
إنتِ كل شوية تكلمي أمك ليه؟ هو إحنا جوزناكي عشان تفضلي معلقة في بيت أبوكي؟
اټصدمت وقلت
ده تليفوني يا طنط.
ردت
وإنتِ بقيتي مرات ابني، يعني لازم تعرفي حدودك.
دخل كريم في اللحظة دي.
قلتله
خد بالك، مامتك أخدت تليفوني من إيدي.
قال
أكيد فيه سبب.
بصيتله مش مصدقة.
قلت
إنت شايف إن ده طبيعي؟
رد
مريم، متخلينيش أختار بينك وبين أمي.
ضحكت من الصدمة وقلت
هو أنا طلبت منك تختار؟ أنا طلبت منك تحترمني.
لكن محدش رد.
مرت تلات أسابيع، وفي يوم كنت قاعدة في أوضتي، سمعت حماتي بتتكلم في التليفون مع أخت كريم.
كانت فاكرة إني نايمة.
قالت
أيوه يا هالة، البنت بدأت تفهم إن البيت ده ليه صاحبة، وأنا مش هسيبها تتحكم في ابني.
وسمعتها بتضحك وتقول
هو إنتِ فاكرة إني هسيبها تاخد مكانك؟ كريم طول عمره بتاعي، ومش هيتغير عشان واحدة لسه داخلة البيت.
وقفت مكاني.
كنت مستنية أسمع باقي الكلام.
قالت
وبعدين أبوها دفع كتير في الجهاز والفرش، وإحنا استفدنا، دلوقتي بقى نشوف هنمشي الأمور إزاي.
قلبي دق بسرعة.
استفدنا؟
يعني إيه؟
فضلت واقفة لحد ما المكالمة خلصت.
دخلت الصالة، ولقيتها قاعدة بتشرب الشاي.
قالت
مالك؟ وشك متغير ليه؟
قلت
كنتِ بتتكلمي مع هالة؟
قالت
وإنتِ مالك؟
قلت
مفيش، بس سمعتك بتتكلمي عني.
ضحكت وقالت
هو الكلام عنك بقى ممنوع؟
قلت
أنا سمعتك بتقولي إن أبويا دفع كتير




